29 Julai 2011

Hii Nayo ni Dawa ya Wizi wa Filamu

Hii Nayo ni Dawa ya Wizi wa Filamu

KARIBUNI sana wapenzi wasomaji wa safu hii ya ‘Vunja vunja’ ambayo hukupatia nafasi ya kujua kila kinachoendelea katika tasnia ya filamu ya nchini hapa.

Leo katika makala ya leo ningependa kutoa ushauri wa bure kwa wasanii wa Tanzania kuangalia suala la kufungua maduka ya kusambazia kazi zao.

Nimeamua kuandika hilo kwa sababu imekuwa kama kawaida kwa wasanii mbalimbali ikiwamo waigizaji wa filamu kulalamikia suala la wizi wa kazi zao.

Unapozungumzia suala la wizi za kazi za wasanii hili halipo hapa nchini pekee bali hata kwa wenzetu walioanza sanaa hizo kitambo ingawa wao hailingani na huku.

Nasema hivyo kutokana na wao kuweka sheria ambazo ni madhubuti zinazowabana wezi hawa na kuwafanya hata wale wanaojihusisha kuwa na woga.

Katika nchi zilizoendelea wamekuwa wakiithamini tasnia hii ya filamu kama moja ya sehemu ambazo zinatoa ajira kwa wananchi wake.

Ukiondoa hilo, pia serikali inajinufaisha kwa kujipatia kodi ya mapato hali ambayo inakuwa na tafsiri rahisi kuwa unapoichakachua kazi ya msanii ni sawa na kuiibia nchi mapato yake.

Kutokana na hilo, wananchi wake wamekuwa wakitambua fika wanapofanya mchezo wa wizi huwa wanakuwa na mashitaka mawili ya kukwepa mapato na wizi, hivyo wanajikuta wakipata tabu pindi wanapobainika.

Kwa hapa kwetu bado hata serikali yetu imekuwa ikichukulia suala la sanaa kama sehemu ya kujifurahisha na kuburudisha na sehemu ya ajira rasmi.

Sababu hiyo ndiyo hasa imefanya hata kushindwa kufikiria kutafuta mapato kupitia filamu au kulivalia njuga suala hilo la wezi wa jasho la wafanyakazi wa tasnia hii.

Kama serikali ingethamini michango yao wangekwenda mbali zaidi kwa kutetea masilahi yao kuliko kuwakaribisha bungeni ambako siku hizi pamepachikwa jina la utani la ‘Kariakoo’.

Sidhani kama msanii mwenye msimamo na anayefikiri sawasawa angekwenda pale na kufurahia kukaribishwa kula kipupwe cha kiyoyozi na watu ambao wanashindwa kuwasaidia kutungwa sheria kali za kuzia wizi wa kazi zao ili wao waweze kufaidika na jasho lao.

Nilisikitika pindi nilipokuwa nikiwaona waheshimiwa hawa wa mjengoni walipokuwa wakiwapaka wasanii wetu mafuta kwa mgongo wa chupa kwa baadhi yao wakitaka kupiga nao picha huku wakijua fika wameshindwa kabisa kuwasaidia kilio chao cha kuwahakikishia wanatambua ajira yao na kuwa rasmi ili kila anayekamatwa kwa wizi atakutana na sheria kali itakayomfanya awe mfano kwa wengine.

Hata kama wahusika watakuwa hawataki kuitambua kama ajira rasmi wangeweza kubadili sheria za zamani za kupigwa faini zisizokidhi na wakati wa sasa ambazo zinaonekana ni adhabu uchwara ukilinganisha na fedha anazokuwa amezichuma.

Kiasi cha faini ambacho kinalipishwa ni aibu kusema kwa kuwa naamini nikikiweka hapa naweza kuzalisha kundi jingine kubwa la wezi wa kazi hizo wakiamini wanao uwezo wa kulipa faini hiyo.

Leo tuishie hapa, karibu wiki ijayo utambue dawa ambayo itawasaidia wasanii wenyewe pasipo kuwategemea zaidi hawa watawala wetu ambao wanaonyesha dhahiri kutoithamini tasnia hiyo.

na Shabani Matutu